"বহুপৰ হ’ল বেলিয়ে লাহ দিয়া
ধান কাটি দাৱনীজাক
এতিয়াও
মাজ পথাৰতে ৰৈ আছেঃ
আজি গধুলি
কমৰেড ৰাভা এইবাটে
আহিব উভতি |
চিফুঙৰ সুৰে-সুৰে
ই গাওঁ, সি গাওঁ, সাতোগাওঁ
ৰজনজনাই যাবহি |
কমৰেড ৰাভা আজি গধুলি
উভতি আহিব ||" ( কবিঃ হীৰেন ভট্টাচাৰ্য)
বিষ্ণু ককাইদেঊ,
তোমাৰ সমাধিত বহি বহি তোমালৈ একলম লিখিম বুলি আজি মোৰ কলম থমকি ৰৈছে- ক’ৰ পৰা আৰম্ভ কৰিম ভাবি পোৱা নাই.. চৌদিশে দেখোন কিবা এক মৌনতা | তোমাৰ প্ৰিয় কবি গৰাকীৰ আজি অসুখ.., তোমাৰ মৄত্যু তিথিত লিখিব পৰাকৈ তেখেতৰ কলমৰ শক্তি নাই, দেহৰো | চাৰিওফালে আজি কিবা এক শূন্যতাই বিৰাজ কৰিছে | এইযেন আন্ধাৰে আৱৰিবহি হেঙুলি আকাশ, আন্ধাৰে লৈ আহিব কিছুমান হতাশা.. ৰাতিপুৱালৈ বাৰু কি খবৰে জোকাৰি যায়হি অসমৰ আকাশ | ভাবি ভাবি ভাবি মন আজি ভাৰাক্ৰান্ত ; অকল মোৰেই নে ? হয়তো প্ৰতিজন অসমত থকা অসমীয়াৰে একেতাই প্ৰশ্ন ? সেই একেই শূন্যতা !! আৰু সেই শূন্যতাইয়ে আজি মোক লৈ আনিছে তোমাৰ সমাধিলৈ, একালৰ ডেকাশক্তিৰ প্ৰেৰণাৰ উত্স “ কমৰেড”, প্ৰতিজন অসমীয়াৰ গুৰু “কলা গুৰু” বিষ্ণুপ্ৰসাদ ৰাভাৰ সমাধিলৈ | কিন্তু কি আচৰিত , ইয়াতো দেখোন সেই একেই শূন্যতা.. মহাবাহুৰ লুইতৰ পাৰত আজি একালৰ সিংহ পুৰুষ, চিৰ তৰুণ, কমৰেড বিষ্ণু ককাইদেউ শুই আছে.. অকলে নিৰৱে.. | মই জানো তুমি সকলো চাই আছা, তোমাৰ সপোনৰ বৰ অসমত কি ঘটি আছে.. তোমাৰ আদৰৰ কৃষ্টিৰ পথাৰ খনত কিমান পৰিৱৰ্তন হ’ল আৰু কিমানজন আহি নপতা ফুকন হ’ল | তুমি চাই আছা.. তুমি আজি নিমাত, নে লুইতৰ দৰেই ভাগৰুৱা.. বধিৰ হৈ গৈছা এই সকলো দেখি দেখি....
বিষ্ণু ককাইদেউ, তোমাৰ সমাধিত বহি বহি আজি তোমালৈ চিঠি লিখিছো... কাৰন তোমাৰ বাবে গান গাবলৈ নাই যে ভূপেনদা.., “বিষ্ণু ৰাভা এতিয়া কিমান ৰাতি হ’ল” বুলি চিঞৰিবলৈ নাই আজি বীৰেন্দ্ৰ্কুমাৰ ভট্টাচাৰ্য ডাঙৰীয়া আৰু তোমাৰ বাবে কবিতা লিখিবলৈ অসমৰ্থ হীৰু দা..., নাই আজি তোমাৰ সেই প্ৰিয় গাওঁ সমুহ, য’ত তুমি সাম্যবাদৰ আখৰা কৰিছিলা | যি কৃষ্টিক আহিলা কৰিয়েই তুমি গাৱে গাৱে সাম্যবাদৰ বাণী বিলাইছিলা অসম আৰু অসমীয়া জাতিটোক একত্ৰিত কৰিব খুজিছিলা, সেই কৃষ্টিয়েই আজি অসম আৰু অসমীয়া জাতিটোক ভাগ ভাগ কৰিলে- বৰ অসমৰ ধাৰণা আজি ৰসাতলে গ’ল | আমি বড়ো, আমি আহোম, আমি ৰাভা, আমি কোঁচ, আমি মিছিং... তাৰ পিছত হে আমি অসমীয়া, বৃহত্তৰ অসমীয়া বহু দূৰৈৰ কথা এতিয়া |
এইবোৰ কথাই চাগে তোমাক আজি নিমাত কৰিলে.. এই সংকটৰ সময়ত কোনে বাৰু গুৰি ধৰিব ডুবিব ধৰা মাজপানীৰ জাহাজখন !! ইয়াৰ বাবে তুমিয়েই জানো উপযুক্ত নহয়... বিষ্ণু ককাইদেউ তুমি উঠা.. তুমি জগাই তোলা আকৌ সেই অসমীয়া সত্ত্বাক, তুমি উঠা.. তুমি আহা, বিষ্ণু ককাইদেউ...
তোমাৰ এজন অনুৰাগী..